الحمل فوق كف الوجع..منقوش بختم دولتك
وياااه غربتك فى حضن الوطن
اصعب قرار
ممكن يكون ..مصير حياتك كلها..
لما بتعلن للكواكب "انك كفيف"
مع ان
نظرك شاف معالم الحياة
وان النجاه من طوق بيخنق سكتك
عكس اتجاهك. دا صحيح
مش كل شىء ف الدنيا ممكن تتفتح لك
من كل باب
وتقول طريق.. امشى فيه
ولا كل حلم عشت به كان لغز ليك
ولا كل ضيقه من حياتك..تبقى ظلم
اختلفنا.. اتفقنا .. مش مهم
المهم ان الكواكب كلها ف "قفص اتهام"
ولو انت قاضى احكم لها "اعدام"
انا عارف ان دا صحيح من المستحيل
ومافيش بديل
انك تحاول من طريق الخوف
وعكسه
او ان خوفك دا بسرعة يكون جبان
وتسيب الكون واللى فيه ويعيش بعيد..
يمكن اكيد
تحس يوم انك بشر
تفتكر
لما تلاقى من نشيد وطنك "حرف ناقص"
تفتكر
انك ساعتها
هتبقى مين
او ابن مين....وانت الضعيف
واقف ف اخر صف خايف
بتشد من ايديهم رغيف.. وتقول جعان
مليون حصارمربوط ف حلق حضرتك
منع الكلام
مليون حصار مسكون ف ضل سكتك
طول مانت شايفنى انكسار
هتفضل كدا"انسان كفيف"
وعنيك مش شايفه السما
ولا حتى نور الليل ساعات
ويقولوا مهما عليك حاجات
وان الحمام مبقاش يطير
وان الحصان مبقاش صهير
وان النجوم مبقتش تطلع ف الظلام
وان السراب اصبح حقيقة
وان البحور بتثور معاك على كل شط
كلام متحط ف دواية حبر
كلام فارغ مالهش اساس
وان الحياة ..ضد الطيور السارحة ف ملكوت الامل
وان السعادة مكنتش حرية
متفكرش انك كدا عشمان ف "ترقيه"
ويقولوا عنك " عبقرى "
وانك بتقدر ترسم الكون بالضلوع
وانك بتقدر تغير من شكل الدموع
وتقولى نهر
متفتكرش انك كدا...محتاج لبحر
علشان تعدى بيه الطريق
متفتكرش
ان اللى قبلك كانوا فاهمين التاريخ
ويكلموك ع غاندى.. وابن بطوطة
دى حياتنا ملطوطة..من قبل ماتكون هنا
فاكر بجد
انك رسمت صوت الرصاص ارض ووطن
مع ان ريحه العفن... ف كل سطر
وف وسط السطر
ميت انا من غير وطن
عيل يتيم من حضن امه اتخطف
طب روح دور ف الكتاب
ازاى هتلر انتحر
وازاى وطنك كان وطن
من غير عبيد..دا كلام عبيط
غير معالم سكتك
ونهاية المشوار .
وقفت من روح رحلتلك
وسألت برضه سؤال وحيد
أنا أبقى مين ؟
0 التعليقات:
إرسال تعليق