فلاش باك ....

كلمات الشاعرة " ضحى جبر

فلاش باك ....

انا بتحداك

انك توصف نفس المشهد

نفس الصورة

نفس الخوف المرسوم جواك دلوقتى

ركز فيا ... وف التجاعيد

نفس الشكل ... كان موجود ف ملامحك انت

قبل سنه او سنتين ... من توقيتى

ركز فيا ... نفس الحزن

نفس الضحكة اللى بتشرب من تفاصيلى

لما بتعطش من الاحباط

وعياط مسكون ف رموش دبلانه

وقلوب عيانه

بمرض السكر

اوعاك تتهز لبشاعه المنظر

انا اقدر

اغير دورك لبطولة مشهد صامت

فلاش باك.....

نفس الصوت نفس الاحساس

جواك بيخاف يطلع للنور

الناس حواليك

طوابير بالدور

تدفع ادفعلك مش ببلاش

وفلاش ف كامرتك مقفول

زووم ..... قرب.. ابعد

نفس الضلمة بتسيطر فيك

تدينى امان اطلع وهاقول

انا مش انسان عايش وخلاص

انا حلم ضعيف.. عايز يكمل

رجع نفس شريط الفيلم

هتلاقى الحلم...

مربوط من ضلعه...

ساكت دائما ..خايف يطلع

من مشهد وهمى ف قصه فيلم

فلاش باك.. رجع نفس المشهد

انا ثابته ....ع منظر واحد

"مش قادرة أحكيه "