حالـة نفــــــي

كتبت / ضحي جبر 

حالــــة نفــــــي

.............

نفت مصادر روحانية.. إن القدر راحل

وانك خفيت نفسك.. بين ضلوع الخوف

والكسوف ف عنيك متبت

والزمن ف الجلد ثبت كل تفاصيل الحكاية

نفت مصادر روحانية

انك بتعلن فوق كتاف الموج غرامك

وان ف كلامك  معنى تايه ف القصيدة

و لسه فاهم م هروبك انه فاعل

للكواكب جزء ثابت

الفلسفة ف عنيك ثواب

والمعطيات واحد

مع انه  .. كبر

****

حاسب ع تجاعيد الدنيا ف وشك

حاسب ع تفاصيل مش شبهك خالص

واكتب ف الشعر غرامك

خليه يشبه قلب حبيبتك

الحروف ف الرف ساكن

اخرج بيه من العتمه ونور كل طريقك

والكلام ...صياد ف سطرك

والحروف مش واقفه صفك

عايزنى ازهد ليه واغامر

***

خارج طابوره الصبح

ساعة  طلوع الشمس

شاف النهارموقوف

لحظة خروجه من المدار

الانبهار نفسه ؟

إستغربك !

واحد صحيح عامل ضرب ف جذع رجولتك

واخد منك دمك....تفاصيلك

واحد جواك متعذب..متغلبط

مسكون باليأس..

احباط مركون ف ضلع الاوضه اللى ف قلبك

مع ان ف عازل ضدك

روحك .. بتتمرد

عايزة تغير المسار

قادرة تدمر كل حاجة لسه باقية ف الحياة

للعلم

انت جاحد